Qadınlarda insulinə həssaslığın azalmasının gözlənilməz təhlükəsi var

İnsulinə qarşı müqavimət anormal uşaqlıq qanaxmalarının əsas səbəblərindən biri ola bilər

Reproduktiv yaşda olan qadınlarda müşahidə olunan anormal uşaqlıq qanaxmalarının səbəblərindən biri insulinə qarşı müqavimət və onunla əlaqəli maddələr mübadiləsi pozğunluqları ola bilər. Bu qənaətə beynəlxalq tədqiqat qrupu gəlib.

32gun.az xəbər verir ki, tədqiqatın nəticələri Menopause jurnalında dərc olunub.

Məlumata görə, qadınların təxminən 30 faizi bu cür qanaxmalarla qarşılaşır və bu, onların həyat keyfiyyətinə ciddi təsir göstərir. Eyni zamanda, azhərəkətli həyat tərzi, qeyri-sağlam qidalanma və artıq çəki ilə bağlı inkişaf edən insulinə qarşı müqavimət xüsusilə doğum yaşındakı qadınlar arasında getdikcə daha geniş yayılır.

Tədqiqat çərçivəsində 18–54 yaş arasında olan 200-dən çox qadının məlumatları təhlil olunub. Onların aclıq vəziyyətində insulin səviyyəsi, bədən kütlə indeksi və bel–bud nisbəti kimi metabolik sindrom göstəriciləri ölçülüb. Yaş və xolesterin səviyyəsinə düzəlişlərlə aparılan statistik analiz nəticəsində qanında yüksək insulin səviyyəsi ilə anormal uşaqlıq qanaxmaları arasında əhəmiyyətli əlaqə müəyyən olunub.

Alimlər bildirirlər ki, menstruasiya pozuntularına qarşı effektiv mübarizə üçün uşaqlığın yalnız reproduktiv orqan kimi deyil, həm də metabolik pozğunluqlardan təsirlənən bir orqan kimi nəzərdən keçirilməsi vacibdir. Uzunmüddətli dövrdə hiperinsulinemiya və artıq çəki ilə mübarizə qadın sağlamlığına dair kompleks yanaşmanın tərkib hissəsinə çevrilə bilər.

Nilay