Masallı Rayon Məhkəməsində 2025-ci il oktyabrın əvvəlində oğurluq hadisəsi ilə bağlı məhkəmə prosesi başa çatıb. Hakim Hüseynov Elşən Təbriz oğlunun sədrliyi ilə keçirilən açıq məhkəmə iclasında Ərkivan qəsəbə sakini, 2000-ci il təvəllüdlü şəxs Cinayət Məcəlləsinin 177.2.3-cü maddəsi (yaşayış sahəsinə qanunsuz daxil olmaqla oğurluq) ilə təqsirli bilinib.
32gun.az xəbər verir ki, İttihama görə, təqsirləndirilən şəxs bu ilin iyun ayında Masallı rayon sakini Faiq Məmmədova məxsus fərdi yaşayış evinə pəncərədən daxil olaraq müxtəlif elektrik avadanlıqları və kabellər oğurlayıb. Araşdırma zamanı müəyyən olunub ki, o, hadisə günü evin pəncərəsini sındıraraq içəri girib və ümumilikdə 710 manat dəyərində əmlakı ələ keçirib. Oğurladığı əşyaları sonradan satdığı, əldə etdiyi pulu isə şəxsi məqsədlərinə xərclədiyi müəyyən edilib.
İstintaq materiallarında qeyd olunub ki, təqsirləndirilən şəxs əvvəllər də oxşar cinayət törətdiyinə görə məhkum olunub, lakin 2021-ci il tarixli hökm üzrə 2022-ci ildə amnistiya aktı ilə azadlığa buraxılıb. Buna baxmayaraq, yenidən eyni xarakterli cinayətə əl atması məhkəmə tərəfindən təkrarlanan cinayət davranışı kimi qiymətləndirilib.
Məhkəmə prosesində təqsirləndirilən şəxs əməlini tam etiraf edib, zərərçəkmişə vurduğu ziyanın tam ödənildiyini bildirib. Zərərçəkmiş Faiq Məmmədov da məhkəmədə çıxış edərək, təqsirləndirilən şəxsdən şikayətinin olmadığını və ona yüngül cəza verilməsini xahiş etdiyini deyib.
Hakimlik sübutları araşdırdıqdan sonra Ərkivan sakininin əməlini “yaşayış sahəsinə qanunsuz daxil olaraq oğurluq” kimi qiymətləndirib və onun bu maddə ilə təqsirli bilinməsi barədə qərar çıxarıb. Məhkəmə həmçinin qeyd edib ki, təqsirləndirilən şəxs gənc yaşda olmasına baxmayaraq, sosial məsuliyyətsizlik və qanuna hörmətsizlik nümayiş etdirib. Bununla belə, onun əməlini etiraf etməsi, ziyanın ödənməsi və zərərçəkmişin barışması yüngülləşdirici hallara aid edilib.
Hakim qərarında Azərbaycan Respublikasının Prezidenti tərəfindən qəbul edilən “Cinayət-hüquq siyasətinin humanistləşdirilməsi haqqında” sərəncamın prinsiplərinə istinad edərək, təqsirləndirilən şəxsə cəzanın məqsədi olaraq cəmiyyət üçün təhlükəliliyin qarşısının alınması və islahın təmin edilməsini vurğulayıb.
Nəticə etibarilə, Masallı Rayon Məhkəməsi Ərkivan qəsəbə sakininin təqsirli bilinməsi ilə bağlı hökm çıxarıb və ona şərti azadlıqdan məhrumetmə növündə cəza təyin edib.
Bu iş Masallıda son aylarda qeydə alınan mülkiyyət əleyhinə cinayətlərin artması fonunda diqqət çəkir. Ekspertlər hesab edirlər ki, rayon yerlərində sosial-iqtisadi vəziyyət, işsizlik və asılılıq problemləri belə cinayətlərin təkrarlanmasına səbəb olur. Hüquqşünasların fikrincə, bu kimi hadisələrdə cəzanın yüngülləşdirilməsi ilə yanaşı, yenidən sosial adaptasiya proqramlarının tətbiqi də vacibdir.
Ayaz
.jpeg)
.jpg)
