İş yerində diqqət və məhsuldarlığı artıran üsullar - Maraqlı ARŞADIRMA

Müasir iş mühitində diqqətin yayılması və məhsuldarlığın azalması bir çox işçinin üzləşdiyi əsas problemlərdəndir. Xüsusilə açıq ofislər, daimi bildirişlər və sosial şəbəkələr fokuslanmanı çətinləşdirir. Mütəxəssislər bildirir ki, düzgün yanaşma və vərdişlər formalaşdırmaqla bu problemin qarşısını almaq mümkündür.

HR mütəxəssisi Rəşad Həsənov 32gun.az-a bildirir ki, iş yerində fokuslanma üçün qısa fasilələr, iş planlaması və prioritetlərin düzgün seçilməsi vacibdir:

“Gündəlik işlər siyahısı yaratmaq, tapşırıqları vaciblik dərəcəsinə görə sıralamaq və eyni zamanda telefon və sosial şəbəkələrdən uzaq durmaq məhsuldarlığı əhəmiyyətli dərəcədə artırır. İşçilər hər 60–90 dəqiqədən bir qısa fasilə verdikdə beyin daha səmərəli işləyir,” – deyə ekspert vurğulayır.

Psixoloq Rəvan Məmmədov isə diqqətin qorunmasında psixoloji amillərin roluna diqqət çəkir. Onun fikrincə, stress və zehni yorğunluq məhsuldarlığın əsas düşmənlərindəndir:

“İş mühitində daimi təzyiq və gərginlik diqqətin dağılmasına səbəb olur. Nəfəs məşqləri, qısa gəzintilər və işə başlamazdan əvvəl məqsədin dəqiq müəyyənləşdirilməsi fokuslanmanı gücləndirir,” – deyə psixoloq bildirir.

Əmək məhsuldarlığı üzrə ekspert Aysel İsmayılova isə zamanın düzgün idarə olunmasının vacibliyini önə çəkir:

“Multitasking – yəni eyni anda bir neçə işi görməyə çalışmaq əksər hallarda nəticəni zəiflədir. Bir işi bitirib sonra digərinə keçmək həm vaxt itkisini azaldır, həm də işin keyfiyyətini artırır,” – deyə o qeyd edir.

Mütəxəssislər, həmçinin iş yerinin fiziki mühitinin də diqqətə ciddi təsir etdiyini bildirirlər. Rahat oturacaq, düzgün işıqlandırma və səs-küyün minimuma endirilməsi işçinin konsentrasiyasını artıran əsas faktorlardandır.

Sosioloq Elvin Quliyev isə rəhbərlik faktoruna toxunur:

“İşçilərə aydın və real tapşırıqlar verildikdə, həmçinin onların əməyinə dəyər verildikdə motivasiya yüksəlir. Motivasiya isə məhsuldarlığın əsas açarıdır,” – deyə sosioloq vurğulayır.

Beləliklə, mütəxəssislərin fikrincə, iş yerində diqqət və məhsuldarlığı artırmaq üçün təkcə fərdi vərdişlər deyil, eyni zamanda sağlam psixoloji mühit və düzgün idarəetmə də həlledici rol oynayır.

Ayaz