Ali Məhkəmə kassasiya şikayətini prosedur pozuntusuna görə geri qaytardı
Azərbaycan Respublikası Ali Məhkəməsinin Kommersiya Kollegiyası "Ayss-2008"MMC ilə cavabdeh MMC arasında olan mübahisəyə dair kassasiya şikayətini icraata qəbul etməyib.
32guni.az bildirir ki, qərar elan olunub.
İş üzrə "Ayss-2008" MMC cavabdeh MMC-dən icra olunmamış müqavilə üzrə ümumilikdə 19 min 573 manat 25 qəpik məbləğində pulun – əsas borc, dəbbə pulu, hüquqi yardım və dövlət rüsumu xərclərinin ödənilməsini tələb etmişdi. İddiaçı şirkətin qanuni təmsilçisi Abdulla Əzizov Əziz oğludur.
Bakı Kommersiya Məhkəməsi iddianı qismən təmin edərək 14 min 253 manat 62 qəpikin cavabdehdən tutulub iddiaçıya ödənilməsinə qərar vermişdi. Qərardan verilmiş apellyasiya şikayəti də təmin edilməmiş və birinci instansiya məhkəməsinin qətnaməsi qüvvədə saxlanılmışdı.
Cavabdeh bu qətnamədən kassasiya şikayəti versə də, Ali Məhkəmə müəyyən edib ki, şikayət Mülki Prosessual Məcəllədə nəzərdə tutulan tələblərə uyğun şəkildə tərtib olunmayıb. Şikayətdə mübahisəyə aid normativ aktların pozulması və ya düzgün tətbiq edilməməsinə dair əsaslandırılmış dəlillər göstərilmədiyi üçün icraata qəbul olunmayıb.
Nəticə etibarilə, kassasiya şikayətinin geri qaytarılması məsələsinə baxılması üçün iş Bakı Apellyasiya Məhkəməsinə yönəldilib.
Ayxan
