Qərbi Azərbaycan HƏQİQƏTLƏRİ: Gərəkli Rayonunun Sofulu kəndindən keçmişə baxış – 1984-cü İl

Bugünkü Qərbi Azərbaycan mövzusu ilə bağlı tarixi həqiqətlərə işıq salan çox dəyərli bir fotoşəkil yayılıb.

32gun.az xəbər verir ki, 1984-cü ildə, yəni azərbaycanlıların doğma yurdlarından kütləvi deportasiyasından az əvvəl çəkilmiş bu kadr, o dövrdə Qərbi Azərbaycanın Gərəkli rayonunda mövcud olan Sofulu kəndindəki həyatın bir anını əks etdirir.

Fotoşəkildə yer alan Zərifə Müəllimə 3-cü sinif şagirdləri ilə birlikdə təsvir olunub. Onların üzlərindəki təbəssüm və gözlərindəki ümid, bu torpaqların əzəli sahibləri olan azərbaycanlıların dərin köklərini və yaşayış tərzini əks etdirir.

Bu foto, təkcə bir sinif otağının deyil, bütövlükdə bir xalqın öz doğma elindəki mövcudluğunun, təhsilə verdiyi önəmin və mədəniyyətinin canlı sübutudur. 1984-cü ilin bu anı, illər sonra Qərbi Azərbaycandan didərgin salınan yüz minlərlə azərbaycanlının acı taleyindən əvvəlki son sülh illərindən bir xatirədir. Sofulu kəndi də digər minlərlə Azərbaycan kəndi kimi, ermənilər tərəfindən azərbaycanlılardan boşaldıldıqdan sonra öz tarixi adını və kimliyini itirmişdir.

Bu fotoşəkil, Qərbi Azərbaycanın tarixi həqiqətlərinin və azərbaycanlılara qarşı həyata keçirilmiş etnik təmizləmə siyasətinin vizual bir şahididir. O, gələcək nəsillərə öz doğma torpaqlarından məhrum edilmiş azərbaycanlıların hekayəsini xatırlatmaqla yanaşı, həm də ədalətin bərpası və tarixi yaddaşın qorunması vacibliyini bir daha vurğulayır. Bu kadrlar, Qərbi Azərbaycana qayıdışın yalnız fiziki deyil, həm də tarixi və mənəvi bir zərurət olduğunu bir daha gözlər önünə sərir. O günlərin xəyal deyil real olacağı ümidini daha da artırır. 

Aygün İlqarqızı