XAMAS atəşkəs müqaviləsi çərçivəsində ağır silahları təhvil verə bilər

Fələstin hərəkatı XAMAS atəşkəs razılaşması çərçivəsində ağır silahlarını təhvil verə bilər.

32gun.az bildirir ki, bu barədə Asharq Al-Awsat nəşri, hərəkatla aparılan danışıqlarda iştirak edən amerikalı vasitəçi Bișar Bahbaha istinadən xəbər yayıb.

Məlumata görə, XAMAS həmçinin Qəzza ərazisində yeni silah hazırlamayacağına və silah qaçaqmalçılığı ilə məşğul olmayacağına dair öhdəlik götürüb. Vasitəçi bu bəndləri “əhəmiyyətli addımlar” adlandırsa da, İsrail hərəkatın bütün tunellərinin ləğvini tələb edir.

Bundan əvvəl bildirilmişdi ki, XAMAS ABŞ Prezidenti Donald Trampın Qəzza münaqişəsini dayandırmaq planında nəzərdə tutulan tam silahsızlanmaya zəmanət verməyib.

Xatırladaq ki, 13 oktyabrda Tramp Qəzza zolağında münaqişənin başa çatdığını elan etmişdi. Lakin o, sonradan xəbərdarlıq edib ki, əgər XAMAS silahı təhvil verməkdən imtina etsə, İsrail ordusu əməliyyatları bərpa edə bilər.

İsrailin Baş naziri Binyamin Netanyahunun sözlərinə görə, 7 oktyabr 2023-cü il hücumunun ildönümündə o, mübarizənin hələ bitmədiyini və XAMAS-ın tamamilə məhv edilməsinin hədəf olaraq qaldığını bildirib. Netanyahunun sözlərinə görə, bu qələbə “İsrail xalqının gələcək onilliklərdəki həyatını müəyyən edəcək”.

Ayaz